قال أحد الشباب (بالعامية المصرية)
من كام شهر كنت بصلي الجمعة في مسجد "آل قورة" في الحي التاني بالمقطم.. والإمام كان شيخ أزهري كبير في السن.. قرأ في الركعتين الفاتحة وآيه واحدة أو آيتين .. وبعد الصلاة مسك الميكرفون واعتذر على إنه أنهى الصلاة بسرعة، لأنه كان سامع صوت طفل بيبكي جنب والده في الصف الاول.. فحب يخلص بسرعة رحمة بالطفل وأبوه.. وبعد كده اتكلم عن الرحمة بالأطفال.. ومحبته ليهم.. وفرحته لما بيشوفهم في المسجد.
امبارح صليت الجمعة في مسجد تاني في نفس المنطقة.. والإمام كان شاب صغير.. وكانت الخطبة عن أخلاق النبي عليه الصلاة والسلام.. وفجأة الإمام شاف طفلين صغيرين داخلين المسجد وهما بيحروا ورا بعض.. ولما قعدوا.. واحد فيهم ضحك.
الإمام قطع الخطبة.. وشخط فيهم:
- إنت يا واد انت.. إيه اللي بتعملوا ده.. وأمر اللي ضحك إنه يقوم من مكانه.. ويقعد بعيد عن صاحبه.. وبعدين قاله: اللي بتعمله ده حراااام (على طريقة نجيبة في فيلم الثلاثة يشتغلونها)
بعد ما خلص صلاة.. مسك الميكرفون.. وعلق على اللي حصل.. وهو بيقول إن ده فساد في التربية (العيلين مش متربين).. أينعم القلم ما كتبش عليهم.. بس اللي حصل ده غلط.. وماينفعش يتكرر.. لكن للأسف إحنا مجتمع فاسد!
في الختام رجع علق تاني على الولدين كرمز للفساد.. آه والله.. فقلت له: والحلم يا مولانا.. حلم الإمام راح فين؟!.. يعني هل ينفع تكسر بخاطر عيلين بالشكل ده.. طيب هما مش الحسن والحسين كانوا بيتنططوا على كتف جدهم النبي وهو ساجد.. وكان يسيبهم براحتهم.. ومفيش حد من الصحابة اشتكى!؟
الإمام حس شوية صغيرين إنه اتحرج.. بص لقى عيل قاعد ساكت جنب أبوه.. راح عامل مقارنة بين أدبه.. وبين سوء تربية العيلين اللي أهلهم طالقينهم علينا.. وإن اللي حصل منهم ده أكبر دليل على الفساد!
قلت له: "ليه حضرتك بتقول فساد.. قول إزعاج".. راح رازعني مقولة عجيبة: " إزعاج أدى إلى فساد"!
يدوب هفتح بوقي وأرد عليه.. فوجئت بهجوم كاسح من اللي قاعدين أصحاب اللحى الطويلة والجلابيات البيضا القصيرة:
- في ايه يا أستاذ.. الإمام بيتكلم صح
- انت بتتناقش في إيه يا حضرة.. إحنا بنستنى الخطبة من الجمعة للجمعة.. وعايز عيلين.... يضيعوها علينا؟!.
الهجوم في البداية كان واحد واحد.. وبعد كده بقى جماعة.. كلهم بيتكلموا في نفس الوقت.. والصوت ابتدى يعلى .. والنقاش خلاص هيقلب بخناقة.. وحسيت إنهم بعد شوية هيشيلوني هيلا بيلا ويرموني بره المسجد..
وبما إن الجبن سيد الأخلاق.. صدّرت لهم ابتسامة.. وأنا بهز دماغي.. على أساس إنهم أقنعوني.. قبل ما أرفع الراية البيضا.. وانسحب من المعركة.. وهما بيودعوني بنظرات تهديد ووعيد لو هوبت هنا تاني.. وخرجت من المسجد تصحبني اللعنات.

ليست هناك تعليقات:
إرسال تعليق
قل خيرا تغنم واسكت عن شر تسلم من قبل أن تندم